إزاي ... مش لو
لقوا مثلا إن المدرسين (رجالة و ستات) بيتقبلوا مقاطعة الولاد لكلامهم في وسط الحصة عن البنات ... و كمان إحتمال مقاطعة المدرس/ة للطالبات في وسط الكلام بتزيد عن نظرائهن من الأولاد ...
إكتشفوا إن المدرسين/ات بيميلوا إنهم يدوا مساحة للولاد للإجابة بعمق علي الأسئلة، بينما بيشجعوا البنات علي السكوت ...
مش بس كده ... ده حتي عملوا تجربة خلوا فيها الولاد و البنات يحلوا إمتحانات الرياضيات (math) بدون ما يكتبوا أساميهم .. في الامتحان ده البنات جابوا درجات أعلي ...
بس لما عادوا التجربة، و سابوا الأسامي اللي بتكشف عن جنسهم، المدرسين إدوا الولاد درجات أحسن ... و ده لأن فيه إنطباع سائد إن الولاد أحسن من البنات في العلوم و الأرقام ..
و عكس الانطباع ده حقيقي بردو في المواد اللي فيها لغات ... فكرة إن البنات أحسن من الولاد في المواد الأدبي اللي فيها كتابة و قراية متجذرة في الدنيا عامة ... علشان كده ممكن نلاقي إن في الكليات الأدبية نسب البنات بتزيد .. و العكس صحيح في كليات العلوم ..
ناس كتير بتفسر ده بأنه شيء في السليقة و في التركيب الرباني بتاعنا .. و في الحقيقة الكلام ده كله طلع هجص و فيه شك كبير فيه ... في مقالها "The myth of Pink and Blue Brains" ليز إليوت بتتكلم عن الفروقات بين تطور عقول البنات و الأولاد ...
إليوت بتوضح إن هم فعلا لقوا فروق طفيفة جدا بين الاتنين عند سن السنتين ... فالذكور مثلا نشاطهم الجسماني أعلي بنسبة بسيطة عن البنات، و عندهم ذكاء مكاني (بيقدروا يحسوا بالأبعاد و أماكن الأشياء) أعلي بنسبة صغيرة قوي بردو .. إكتشفوا كمان إن البنات قدراتهم علي التخاطب أعلي بنسبة صغيرة، بما إنهم بيتكلموا في المتوسط شهر أبدر من الولاد ...
بس الفروقات ديه مش كافية بأي شكل إنها تشرح الاختلافات الرهيبة اللي بتحصل بعد كده في القدرات .. و اللي إكتشفوا إنها بتزيد كل ما الأطفال يكبروا و عمرهم يزيد .. فليه فعلا البنات بتكتب أحسن من الولاد في المتوسط .. و الولاد أقوي في الرياضيات؟؟
الإجابة كانت موجودة في البيت ...
لما بدأوا يراقبوا بيوت الأطفال كل ما أعمارهم بتزيد، إكتشفوا إن إنطباعات الأهل عن قدرات عيالهم بتحدد بشكل كبير هم هيكونوا إيه .. فغرف نوم البنات كانت كلها كتب مثلا، بينما الولاد كانوا كل لعبهم كور و عربيات و LEGO و ميكانو .. فبالتالي عند البنات مهارات القراءة و الكتابة تم الاهتمام بيها، و عند الولاد مهارات الحركة و الذكاء المكاني كان عليها العين ...
فالفروقات اللي كانت لا تذكر، إنطباعاتنا عمقتها و زادت من حدتها ...
لازم نسأل نفسنا إزاي أفكارنا المسبقة عن الولد و البنت ممكن تأثر بشكل سلبي علي تدريسنا و تربيتنا في الفصل و في المدرسة؟ و خصوصاً خصوصاً لو احنا رجالة ...
إزاي ... مش لو ...