خاطر عن المظاهرات و أمريكا و التراكم
هورتون قعد سنين و سنين بيدرس إزاي ممكن يعلم و يتعلم مقاومة الظلم ... و إزاي ممكن يساهم في خلق مجتمع أكتر عدالة، بيساهم فيه أصحاب السلطة في تمكين من هم أقل قوة ...
و لأنه كان مؤمن إن إحتكار العلم و مركزيته من أكتر الحاجات اللي بتخلي الظلم يستمر، فتأثره بنموذج المدارس المجتمعية الدنماركية ما كانش صدفة .. بما إنها تحدت ثنائية المدرس و الطالب .. و أن مفيش حاجة إسمها إن المدرس بيملك المعلومة ... و إن الطلبة كل دورهم إنهم ياكلوا المعلومة بالمعلقة ...
في المدارس ديه، الطلبة بتجاربهم الثرية، كانوا دايما عندهم حاجة يقدموها و يعلموها للمدرسين .. و كانوا بيختاروا مباشرة هم نفسهم يتعلموا إيه، و إزاي يديروا تفاصيل يومهم بطريقة حرة ..
هورتون نقل التجربة للجنوب الأمريكي، بعنصريته الممهنجة و المؤسسية ... و أدرك إن التجارب الفارقة - اللي بتغير بجد - بتيجي عن طريق خلق إحساس جماعي بالانتماء لكيان واحد .. يكون الكل بيديروه مع بعض ... بيتعلموا فيه مع بعض و من بعض ... و فيستوعبوا إن كل أنواع الظلم بتأثر علي بعض .. و مرتبطة ببعض ..
ساعتها أسس مركز Highlander و اللي كان ليه دور محوري في حركة الحقوق المدنية و خلق شبكة منظمة من النشطاء السود و البيض ...
فالمركز مثلا أحد رواده كانت روزا باركس .. السيدة الجنوبية السوداء اللي معروفة بأنها تحدت الممارسة العنصرية، لما رفضت تقعد ورا في الأتوبيس .. في تحدي صارخ لقانون كان بيجرم علي السود إنهم يساووا راسهم "بأسيادهم" البيض و يقعدوا معاهم ... نكتشف مع السنين إن رفضها، اللي بيعتبر من الأحداث اللي أشعلت شرارة الحركة .. كان في الحقيقة نتاج تنظيم حقيقي .. و جزء كبير منه اتعلمته و حصل في المركز ..
هورتون حاول يلضم بين الحركة العمالية و حركة الحقوق المدنية .. لو فيه مثلا إضراب في منجم ، رؤوس حركة الحقوق المدنية السود كانوا أول من بيشاركوا فيه ... و العكس صحيح ... و ده في حد ذاته كان إنجاز .. فكرة إن عامل منجم أبيض يقف جنب راجل أسود في جنوب أمريكا علشان هدف مشترك، كان نقلة حقيقية في تاريخ الجنوب ..
مركز Highlander لغاية النهاردة مدار بأغلبية سوداء و بطريقة ديمقراطية .. و بالرغم من إن الحكومة الأمريكية قفلتوا كذا مرة، إلا إن خريجيه مكملين مشوار هورتون كان بدأه من سنين كتير ..