الغريب في الأمر
الثورة بقت سجن في مخي
الثورة بقت في سجن مخي
قضبانه من سراب محسوس
أسيرة خيال حابس
ماهوش محبوس
ييجي يوم يفكر يكارك
يتقال له بم .. فينام
و يصبح تاني يوم مخروس
الغريب في الأمر
إن قضبان السجن
ما بناهاش سجان
الحقيقة في الحقيقة
إن سجان عقلي
بقي أنت يا صاحبي
في أغلب الأحيان
آجي أسألك ليه المقاوحة و السلام
اتاريك مرعوب لتفقدها
كأنك شاريها و مالكها
و كيفك تداويها بتكرار الكلام
معقولة للدرجه دي خوفك عليها
... خلاك جبان
علي طول محجمها، ملجمها
فكرك إنك حاميها، مسستمها
و في الواقع أنت بتردمها
يا تفضل معاك و تسجنها
يا ترميها البحر
شكلك نسيت
إن الفكرة
زي الهوا في خفتها
مبتتنحتش في صخر
الحقيقة في الحقيقة إنك يا صاحبي طلعت بشر
فشر، إللي يقول عليك كداب
شجاع في صمودك
أناني في بطولتك
عنيد في ردودك
بيغويك خلود، نفسك تكتبه بحروف من دم
ما تشيلش هم
مش بيغريك لا مال ولا جاه
لكن بتغويك روايات البطولة
بكل إمعان
عايز صورتك أنت بس تفضل في الميدان